من شاف سيارة الاستاذه ساره

من شاف سيارة الاستاذه ساره

سـافر الأستاذ خالد المحاضر في جامعة الملك سعود بالرياض الى أمريكا لاكمال دراستة , والحصول على شهادة الدكتوراه , وذلك في بداية العام 2011 . وكـانت برفقته زوجته الباره سـاره والتي تعمل مدرسه في احد ثانويات الرياض , ثـم ومع بداية العـام 2013 وفي يوم من الأيام , كـانوا يشاهدون قناة السي ان ان الامريكيه وفجأه اذا بالخبر المفاجاه ( السعوديه تسمح بقيادة المرأه للسياره ) فتحفظ خالد وفرحت ساره , فهي قد تعلمت القيادة في السنتين الماضيتين وحصلت على رخصة قياده امريكيه . فبادر زوجها : أي هين افرحي على بالك بتاخذين راحتك زي هنا. فردت : وافضل من هنا بعد , احنا بلد مسلم وآمن وصدقني بتصير القياده هناك أفضل بكثير ..طيب بيجي يوم واذكرك ... ثم وفي عام 2015 حصل خالد على الدكتوراه وعادوا الى الوطن. أستأجر شقه في احد الأحياء , وبعد إصرار من زوجته قام بمساعدتها فالحصول على رخصة القياده السعوديه واشترت لها سيـارة جديدة , ثم وفي أول صباح تقود فيه ساره سيارتها لتتوجه للمدرسه .

اووف وش هالحظ , ولد جارنا ذا ما يستحي مالقى يوقف الا ورى سيارتي .. واتصلت على زوجها وهو لم يستيقظ بعد .. هـا وش عندك مع الصبح .. ياخي قوم شف ولد جارنا ذا ساد على سيارتي .. ياليل هذا وتونا مابدينا .... فقــام خالد و حل الموضوع ... وذهبت ساره الى المدرسه واوقفت سيارتها بعيدا لعدم توافر المواقف الكافيه امام المدرسه . ثم..

وبعد انتهاء الدوام وفي اثناء عودتها قدر الله انها ما انتبهت وصدمت سيارة شايب كان واقف قدامها فالاشاره صدمه خفيفه... فنزل الشايب معصب وهي متسمره من الخوف في مقعدها .. ويوم شافها قال : وراك يا مره انتي ماتشوفين .. ياجعل عيونس العمى . الشرهه مو عليك الشرهه على من سلمك السياره . فاتصلت على زوجها فالحال .. خالد الحقني صار عليه حادث .. والرجال وسط المحاضره .. فاعتذر من طلابه وتوجه لها فالحال .. المهم مرت 45 دقيقه في انتظار سيارة ( نجم ) والزوج ايضا ,, وهي قافله على نفسها في السياره لتتحاشى مقدمي الفزعات وعشاق الجمهرة . وبعد ساعتين انتهت الامور . ثم ..

وبعد العصر قالت يالله ود السياره الورشه ... فقالها : ليش انتي ماتودينها .. مجنون انت تبين ادخل الصناعيه وادخل الورش واقعد معهم ياسلام سلم .... الله يعيني عليك ... وراح وودى السيارة .. وعادت اليها بعد أسبوع .. ثم ...

انا رايحه السوق .. وفي الليل وعند عودتها .. وبالصدفه كان الهلال حاصل على بطوله ودخلت المسكينه وسط موكب تشجيع وما هي داريه شسالفه .. الا والعرابجه محيطين بها من اليمين واليسار .. هلا بالحلو هلا بالمزيون .. مبروك الفوز يا زعيمه .. واللي يرمي عليها علم واللي يرمي رقم واللي واللي .. وهي قد نشفت من الخوف .. واتصلت .. خالد الحقني انا وانا وانا .. ياليل طيب وش تبيني اسوي لك .. اتصل عالشرطه .. لكن الله ستر و انتهى الموضوع على خير .. ثم ...

بطلع للثمامه مع خواتي .. وفالطريق تفتيش مفاجئ .. وعسكري ملكع .. الرخصة لو سمحتي.. والاخت ناسيتها فالبيت للأسف نسيتها فالبيت.. اجل على جنب الله يخليك .. واتصلت .. خالد نسيت الرخصة جبها لي تكفى والا بيحجزون السياره ... يا ليل طيب ... وقعدت ساعة الين جـابها وانتهى الوضع بمخالفة عدم حمل رخصه ... ثم...

بروح للعرس .... وفي طريقها بنشرت السياره في شارع مزدحم .. فأسقط في يدهــا .. فاتصلت .. خالد السياره بنشرت .. ياليل طيب ما تقدرين تغيرينه .. انت مجنون محلاني بعبايتي وشيلتي وانا ماسكه مفك العجل .. بعدين ما بي اخرب كشختي .. طيب انا جايك .. واثناء الانتظار .. مر من جنبها واحد .. ها يا حلو اصير لك استبنه ,, والثاني يقول أصير لك مفك عجل والثالث يقول ارفع السياره على ركبتي لعيونك الحلوه .. واللي جاء مطبح وقال أي خدمه يا قمر ترى أعجبك 20 سنه خبرة بناشر انتي تدللي بس .. فعودت المسكينه قفلت قزاز السياره من الخوف وقعدت تنتظر.. حتى وصل خالد و حـل الموضوع ... ثم ...

خالد سيارتي يبي لهــا غسيل وتغيير زيت .. طيب روحي المحطة اللي في آخر الحاره .. انت مجنون محلاني وانا واقفه مع ابو يمن .. اجل انتظري الين يفتحون محطه نسائيه خخخخخ ... تستهبل يا خلود ,, لالا امزح بس طيب وين المفتاح ابروح ... ثم ...

الوووووووووووووووووووو خالد الحقني .. خير وشفيه . زنزلت البقاله اشتري عصير ورجعت مالقيت السياره شكلها انسرقت .. اووف ليش انتي تركتيها شغاله ... ايوه ... ياحظي .. وربي انتي مهبوله .. عاد وش اسوي قدر وصار ... طيب الحين اجيك.. وتم ابلاغ المرور والشرطه .. وشهر كامل ولا فيه خبر عنها .. والله واعلم وينك يا سيـارة ســاره ؟؟

وبعد شهرين بدون سياره .. طيب ما يصير اجلس كذا وش رأيك أستأجر سياره ؟؟ أقول الا وش رأيك تنثبرين .. انا قايل لك من اول ترى الوضع مو بزي امريكا ما صدقتي ... طيب وش الحل بوجهة نظرك ؟؟ الحل اني بجيب لك ســواق على حسابي وفكينا من سالفة السواقه .. يا سلام طيب يا دكتور يا محترم .. ممكن أسألك سؤال ..

ليش تمنعني من السـواقه وترضى تركبني مع واحـد غريب ؟؟ والا منت خايف علي منه ؟؟



شخصيا ...

حتى وان سمحت الدوله رسميا بقيادة المرأه للسياره فـلـن أسمح انا فيم يخصني ... لاني لا أريد ان أكون خالد مكرر ...

ولكـــن ...

ترى مافيه مانع اذا احد منكم قدر يساعد الدكتور خالد في الاجابه عن سـؤال الاستاذه ساره ....
انشا اله تعجبكم انتضر ردودكم

تسلمين موضوع رائع جدا